كما تدين تدان

قصة_سيدنا_يونس_عليه_السلام

ذي_النون_يونان

صاحب_الحوت

يونس بن ( متى ) من نسل سيدنا إبراهيم ، و(متى) تبقى والدته ، مافيش نبي تم تعريف اسمه باسم والدته غير سيدنا عيسى بن مريم وسيدنا يونس.. 

وفي اليهودية اتسمى بـ ( يونان ) بن أمتاي ، وفي القرآن اتسمى بذي النون؟ والنون هو الحوت ، وكمان اتسمى بصاحب الحوت و يونس ، وفي سورة في القرآن ب اسم سيدنا يونس.. 

بعث الله سيدنا يونس الى أهل ( نينوى ) شمال العراق قريبة بالموصل ، أهل ( نينوى ) كان عددهم كبير جدا ، كانوا أكتر من مئة ألف نسمة ، كانوا بيعبدوا الأصنام فعشان كده ربنا أرسل سيدنا يونس ليدعوهم لعبادة الله الواحد وترك عبادة الاصنام.. 

أهل ( نينوى ) كذبوا دعوة سيدنا يونس وفضلوا على كفرهم وعنادهم ، فلما سيدنا يونس يأس منهم راح لهم وحذرهم أن بعد ٣ ايام ربنا هينزل عذابه.. 

ربنا أمر سيدنا يونس أنه يحذر قومه ، لكن سيدنا يونس ساب قومه غضبان من كفرهم من غير ما ياخد أمر من ربنا بالخروج من المدينة ، فبالي عمله سيدنا يونس خالف أمر ربنا!.. 

مشي سيدنا يونس من مدينة ( نينوى ) لقي نفسه عند شاطئ البحر ، كان عند الشاطئ في ناس كتير واقفة بتشحن سفينة بالبضائع للسفر ، سيدنا يونس راح واستأذن من صحاب السفينة انه يركب معاهم ، وافقوا وركب سيدنا يونس السفينة... 

طيب ايه اللي حصل في أهل ( نينوى ) سيدنا يونس وعدهم أن بعد ٣ ايام ربنا هينزل عذابه عليهم؟ 

في أول يوم من التلات ايام لقوا أهل ( نينوى) سحابة سوداء كبيرة جدا حجبت عنهم ضوء الشمس! يعني يوم كامل فضلوا في ظلام مفيش نور شمس ، الأمطار نزلت سيول على أهل ( نينوى) صوت الرعد والعواصف في السماء! خافوا جدا أهل نينوى وقالوا إن سيدنا يونس دعوته على حق وعذاب ربنا حق! كُبارات المدينة اجتمعوا عشان ينقشوا الأمر فاتفقوا ان لازم يتقربوا من ربنا عشان يشيل عنهم العذاب؟! كل أهل نينوى لبسوا لبس مرقع والنساء خرجوا من بيتهم وفضلوا يبكوا ويدعوا ربنا ، حتى اللي كان عندها طفل رضيع كانت بتبعد عن أبنها وتروح للجبل عشان تستغفر من ذنوبها وعشان ربنا يقبل توبتها.. 

كل أهل ( نينوى ) آمنوا بالله وتركوا عبادة الأصنام! ربنا انزل على قلوبهم السكينة وشرح قلوبهم للايمان به، مئة ألف أو يزيد عن عشرين ألف ، بعد ما كانوا كفار اصبوا مؤمنين بالله وهي القرية الوحيدة اللي تحول أهلها من الكفر للايمان؟ مفيش قرية كانت كافرة بالله آمنت بعد كفرها غير قوم سيدنا يونس.. 

( فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهآ ) سبأ ( 34 )

( إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا وَمَتَّعْنَاهُمْ إِلَى حِينٍ } [يونس: 98]

وده في درس كبير أن الأنبياء مينفعش أنهم ييئسوا من الكافر لازم يكون عندهم صبر مهمه حصل لهم ، لان ربنا قادر انه يهدي عبادة ... 

نرجع لسيدنا يونس 

سيدنا يونس حصله ايه في السفينة؟!

ربنا كان عقابه ايه؟! 

لما السفينة اتحركت الجو اتغير؟ الرياح بقيت شديدة ، المطر زاد ، عواصف ، السفينة فضلت تتمايل بيهم في عرض البحر! صريخ وهرج ومرج بين ركاب السفينة ، السفينة مالت بيهم جامد! 

السفينة بتغرق! 

هنا كان لازم يخفوا حمولة السفينة من البضائع

بدأوا الركاب يرموا البضائع ف البحر عشان السفينة متغرقش بيهم ، لكن برضه بعد ما رموا كل البضائع السفينة لسه بتتمايل بيهم بل التمايل زاد اكتر من الاول! 

هنا قرروا يرموا من ركاب السفينة؟! قرروا يعملوا قرعة ، واللي يقع عليه السهم هو اللي هيرمي نفسه في البحر وبعدها يكرروا القرعة تاني وهكذا لحد ما السفينة تخف من حمولتها تخف!..

كل ما كانوا يعملوا القرعة تقع على سيدنا يونس! 

فركاب السفينة يعيدوا القرعة من تاني لانهم شافوا ان سيدنا يونس مش من أهل السفينة ضيف عليهم وغير كمان انه باين عليه الصلاح فعشان كده كانوا بيرفضوا أنه يرمي نفسه..

الحيتان كانت بتعوم حوالين السفينة يعني اللي هيرمي نفسه في البحر الحيتان هتبلعوا! 

كرروا القرعة تلات مرات في كل مرة سهم سيدنا يونس يقع عليه الاختيار! فهنا ركاب السفينة قرروا انهم يرموا سيدنا يونس لان معندهمش خيار تاني!..

سيدنا يونس رمى نفسه في البحر! 

مجرد ما رمى نفسه البحر هدي ، الامواج هديت والعواصف كمان هديت ، السفينة رجعت تبحر بشكل طبيعي! يعني اللي كان مقصود هو سيدنا يونس لان ده عقاب من ربنا على مختلفه لأمر ربنا!..

وَإِنَّ يُونُسَ لَمِنَ الْمُرْسَلِينَ * إِذْ أَبَقَ إِلَى الْفُلْكِ الْمَشْحُونِ * فَسَاهَمَ فَكَانَ مِنَ الْمُدْحَضِينَ * فَالْتَقَمَهُ الْحُوتُ وَهُوَ مُلِيمٌ }.

مجرد ما سيدنا يونس رمى نفسه في البحر ، بعث الله حوت عظيم بلع سيدنا يونس! ربنا أمر الحوت أن لا يأكل له لحمًا ولا يهشم له عظمًا ، الحوت أخذ سيدنا يونس وطاف به في عمق البحر! الحوت لقي حوت اكبر منه ابتلعه! ظلام شديد على سيدنا يونس ؟ ظلمة الليل وظلمة البحر وظلمة الحوت! 

سيدنا يونس افتكر انه مات فلما لقي نفسه بيتحرك في بطن الحوت سجد لله شكر على نجاته ، هو في بطن حوت طبيعي ان الحوت يأكل سيدنا يونس فده معجزة عظيمة من ربنا.. 

سيدنا يونس ندم على ذنبه ، وقف في بطن الحوت وصلى لله وسجد وقال لله:

- يا رب اتخذت لك مسجدًا لم يعبدك أحد في مثله.

سيدنا يونس بدأ يسمع أصوات تسبيح؟ استغرب وسأل نفسه مين اللي بيسبح ، ربنا اوحى اليه ان ده تسبيح مخلوقاته؟! الأسماك وكل شيء داخل عمق البحر بيسبح لله.. سيدنا يونس سبح الله وقال

( لا اله الا انت سبحانك اني كنت من الظالمين )

الملائكة سمعت دعاء سيدنا يونس فقالت الملائكة لربنا:

-  يا رب صوت ضعيف معروف من بلاد غريبة.

فقال: أما تعرفون ذاك؟

قالوا: يا رب ومن هو؟

قال: عبدي يونس.

قالوا: عبدك يونس الذي لم يزل يرفع له عملًا متقبلًا، ودعوة مجابة.

قالوا: يا ربنا أو لا ترحم ما كان يصنعه في الرخاء فتنجيه في البلاء؟

قال: بلى، فأمر الحوت فطرحه في العراء ».

سيدنا يونس فضل في بطن الحوت ٤٠ ليلة وفي رواية ٣ ليالي وفي رواية تالته أنه فضل في بطن الحوت ٧ ليالي ، ولولا أنه سبح واستغفر كان هيفضل في بطن الحوت الى قيام الساعة!..

ربنا أمر الحوت أن يلفظه في الصحراء؟! 

الحوت لفظ سيدنا يونس في الصحراء ، مكان مفيهوش اشجار ، كان مريض ، الجلد اتشال من سيدنا يونس بقى جسم نحيف جدا ولحمه مكشوف!.. 

سيدنا يونس نايم على الرمل ، حرارة الشمس القوية تؤذي لحمه المكشوف! ربنا كان رحيم بيه؟ ربنا أمر الأرض أن تنبت شجرة ( يقطين ) اليقطين هو القرع ، ليه شجرة اليقطين بذات؟ لان اليقطين فروعه كبيرة وكثيفة ف ورق اليقطين هيغطي سيدنا يونس ويحمي من حرارة الشمس ولحم جسمه المكشوف مش هيتأذي.. 

وجت بعد كده غزالة لسيدنا يونس كان بيتغذى من لبنها كل يوم لحد ما استرد صحته من تاني.. 

بعد ما استرد سيدنا يونس صحته راح لاهله تاني مشي في الصحراء على اقدامه لحد ما وصل لمدينة ( نينوى) وهنا سيدنا يونس شاف معجزة ربنا؟ 

لقي أهل نينوى كلهم مؤمنين بالله ، ربنا أنزل رحمته على المئة الف من أهل نينوى واصبحوا مؤمنين بالله وعاش سيدنا يونس مع قومه المؤمنين..

****

دعوة سيدنا يونس في بطن الحوت دعوة عظيمة إن دعا بها مؤمن استجاب الله له كما جاء في حديث لسيدنا محمد

قال ابن جرير: حدثني عمران بن بكار الكلاعي، حدثنا يحيى بن صالح، حدثنا أبو يحيى بن عبد الرحمن، حدثني بشر بن منصور، عن علي بن زيد، عن سعيد بن المسيب قال: سمعت سعد بن مالك - وهو ابن أبي وقاص - يقول: سمعت رسول الله ﷺ يقول:

« اسم الله الذي إذا دعي به أجاب، وإذا سئل به أعطى: دعوة يونس بن متى ».

قال: فقلت يا رسول الله: هي ليونس خاصة أم لجماعة المسلمين؟

قال: « هي ليونس خاصة وللمؤمنين عامة إذا دعوا بها. ألم تسمع قول الله تعالى: { فَنَادَى فِي الظُّلُمَاتِ أَنْ لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ * فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنْجِي الْمُؤْمِنِينَ } فهو شرط من الله لمن دعاه به ».

ياريت نكثر من دعاء سيدنا يونس في الوقت ده ليرفع الله عنا البلاء 

لا إله إلا أنت سبحانك إني كنت من الظالمين