كما تدين تدان

#سيدنا_موسى_الحلقة_التالته

#فرعون_مصر

كل يوم بيكبر سيدنا موسى في قصر فرعون ، اخد رعاية وحنان مفيش حد من بني اسرائيل خدها ، اتعلم تعليم عالي وبقى شخصية مُثقفه جدا وصاحب عقل تفكيره قوي.. حتى جسمه كان قوي وده بسبب انه كان بيمارس كل انواع الرياضة.. 

فأصبح جثمانه قوي جدا.. 

كل اللي حصل لموسى وهو طفل وتربيته في قصر فرعون لسبب من عند ربنا؟ كان بيعد سيدنا موسى للنبوة  ليصبح قائد لبني إسرائيل و يخلصهم من فرعون الظالم ، كان اختبار وتعليم لموسى عشان لما يجي وقت المواجهة بين موسى وفرعون يكون شخص صاحب عقل وفكر قوي يقدر يجادل فرعون في ادعائه انه اله ( عاش مع فرعون عشان يعرف انه شخص عادي بياكل ويشرب وينام زي باقي الناس مش إله ولا حاجة ) كمان عاش ما بين آسية وامه أو مرضعته (  يوكابد ) وحب اخواته وحب بني إسرائيل .. 

كمان ( يوكابد) كانت بتزرع فيه حب الدين والإيمان بالإله الواحد ، كانت دايما بتحكيلو عن سيدنا يوسف  وقالت له انه من اجدادها واجداد بني اسرائيل ، لحد ما سيدنا موسى اخد سيدنا يوسف مثل اعلى ليه وحبه جدا ، غرزت فيه حب لبني اسرائيل و  نصرة الضعفاء من صغره عشان لما يجي الوقت ما ينصرش الظالم ... 

****

لما بقى عمر سيدنا موسى ٣٠ سنة ، خرج في يوم من قصر فرعون اللي مكانه على أطراف المدينة بعيد عن مساكن الفقراء من بني اسرائيل وعامة الناس..

دخل للمدينة اللي بيعيش فيها بني إسرائيل ، خرج بليل عشان محدش يشوفه وهو داخل لأن الأمراء وحاشية فرعون اللي منهم موسى مينفعش يتجول في مكان الفقراء ، فلو حد شافه ممكن يتم اكتشاف أمر موسى أنه واحد من بني إسرائيل ويتقتل!..

فعشان كده خرج بليل ..

وهو في طريقه شاف واحد من الأقباط ومن سكان قصر فرعون بيتخانق مع حد من بني إسرائيل الفئة المستعبدة ..

اللي من شيعة موسى اللي هو رجل بني اسرائيل استغاث بموسى يجي ينصره..

لبى موسى عليه السلام النداء وراح ناحية الاسرائيلي

هنا بقى كان اختبار ربنا 

موسى هيختار ايه ، هيختار نصرة الظالم ولا المظلوم؟! 

سيدنا موسى اختار نصرة المظلوم الضعيف من بني اسرائيل على الظالم من أهل فرعون..

سيدنا موسى قرب و ضرب القبطي بقبضة يده فمات على الفور!..  

سيدنا موسى كان قوي فبضربه وحده موتت القبطي! 

ندم سيدنا موسى ندم شديد ، قال لربنا 

" هذا من عمل الشيطان إنه عدو مضل مبين "

 وطلب من ربنا يغفر له وقال

 ( رَبِّ إِنِّي ظَلَمْتُ نَفْسِي فَاغْفِرْ لِي )

ندم لانه من المحتمل أن القبطي يكون على حق وان اللي من شيعته الرجل اللي بني اسرائيل يكون هو الغلطان! 

اتعلم سيدنا موسى درس انه يحكم عقله الاول قبل  قلبه ، يحكم ويعرف القصة وميتهورش بعد كده..

ده ماكنش اخر اختبار لسيدنا موسى

تاني يوم لقى اللي من بني إسرائيل نفس الشخص بيتخانق مع شخص تاني ، فراح له وقال له:

- انت شكلك شخص دايما بتتخانق وبتعمل دايما مشاكل 

سيدنا موسى مسكوا من ملابسه بقبضة ايده فخاف اللي من بني إسرائيل أن سيدنا موسى يقتله زي القبطي! فقال رجل بني إسرائيل:

- انت شخص بتحب الظلم مش عايز تطبق العدل و هتموتني زي القبطي!

سيدنا موسى حكم علقه وسابه ومشى.. 

سيدنا موسى هو راجع قابله شخص من المقربين من فرعون قال له:

- لازم تهرب حالا؟! فرعون عرف بقتلك للقبطي وعرف انك من بني إسرائيل! هو جامع الأمراء وحاشية بيرتبوا لقتلك!

اول ما سمع الخبر ده خاف جدا ، هرب على صحراء سيناء  من غير ما يودع اهله ، هو بيجري ومش عارف هو رايح فين! بيجري من غير هدف ، دعا ربنا انه يلهمه المكان الصحيح ، ٨ ليالي ماشي ، تعرض لصعوبات كتير وهو ماشي في الصحراء ، عطش شديد ، هدومه اتقطعت من حرارة الشمس وجلد رجله ساح من الشمس أظافره اتشالت! 

فضل على كده لحد ما وصل لمدينة ( مدين ) بالاردن

ووقف عند بئر مياه! اقصى امنية اي حد ف موقف سيدنا موسى اول ما هيشوف ماء البئر هيجري يشرب منه ، لكن لما قرب ع البئر شافه انه زحمة جدا وفي رجال كتير حوالين البئر ، وبنتين واقفين في حالة حزن شديد وبيبعدوا المواشي بتاعتهم من عند البئر؟ 

قرب عليهم سيدنا موسى وسألهم ليه بيعيطوا؟

ردوا عليه:

- بقالنا ساعات واقفين ومش عارفين نشرب الاغنام من مياه البئر وابونا رجل كبير في السن ومعندناش اخوات ذكور يسعدونا! 

سيدنا موسى صعب عليه حالة البنتين أخد منهم الاغنام وتدافع وسط الناس وسقاهم من ماء البئر..

شيء كله انسانية من سيدنا موسى لو حد تاني مكانه وتعبه الشديد مكنش عمل كده ، بس اللي عمله ربنا هيجازيه خير عليه... 

قعد سيدنا موسى وسند ضهره ع شجرة ودعا ربنا واشتكاه انه مش معاه قوت يومه ومش عارف يتصرف ازاي؟ كان قادر يطلب من حد انه عايز ياكل لكن عزة نفسه مخلتوش يعمل كده هو اتربى من صغره على عز مش يمد ايده لحد.. 

في الناحية التانية البنتين واقفين مع ابوهم ( شعيب ) عليه السلام هما أولاد سيدنا شعيب.. 

بنت من بناته وقعت في حب سيدنا موسى تعلقت بيه ، فقالت لابوها سيدنا شعيب:

- يا أبتي استأجر الفتى عسى ان ينفعك فهو قوي 

رد سيدنا شعيب على ابته:

- نعم جسده قوي وما ادراكي بأمانته؟!

هنا حكت له على موقف سيدنا موسى معاهم وعن شهامته وازاي تدافع وسط الحشد عشان ساعدنا..

في اللحظة دي سيدنا شعيب اتأكد ان الفتى امين فأخبر بنته وكانت اسمها ( صفورا ) انها تروح لموسى عليه السلام تدعو الفتى موسى ل سيدنا شعيب وتقول له ان ابوها هيدي أجر على اللي عمله معاهم.

فعلا راح معاها ولم ينظر للبنت طول الطريق حياء منه وأدب من سيدنا موسى وحتى البنت كانت ماشيه وهي لا تنظر لموسى عليه السلام لحد ما وصلوا للبيت.

لما وصلوا سيدنا شعيب اثنى على موقف الفتى موسى عليه السلام وقال انه هيشتغل عنده لكن مش هيقدر يديه أجر لانه فقير ، فأجره هيكون جوازه من احد بناته وكانت هي ( صفورا ) واتفق مع سيدنا شعيب ان مدة اقامته معاه هتكون ١٠ سنين..

يتبع..